Kampanya li dijî sunetkirina keçan mezin dibe


Kaniyasipi

EuroKurd Human Rights-EHR, li dijî sunetkirina keçan li Herêma Kurdistanê kampanyek dabû destpêkirin.
Li ser pêşveçûnên dawî, ji EHR ê rojnamevan Gabar Çiyan dîtina xwe wisa anî zimên:
”Li dijî sunetkirina keçan li Herêma Kurdistanê kampanyek navnetewî di meha sibatê dest pê kiribû. Li welêt jî, di rêvebiriya Wadi, Stop FGM Kurdistanê de û bi piştgiriya Hawlati, Lven, Rozhnama ev kampanya rengek nû û xurt girtibû. Li derveyî welêt jî gava bi wate ji aliyê EHR, bi hevkariya WomenAid, Wadi û CHAK ê hatibû avêtin.
Kampanya EHR ya li derveyî welêt, hefteya derbasbûyî bi têkiliyên yekser ketibû qonaxa duwem. Me bi şêweyekî eşkere ji ”rêvebiriya Komîsyona Yekitiya Europa-EU, ji berpirsiyariya giştî ya Unicef, WHO û Yekîtiya Miletan-UN Şaxê Mafê zarokan & mirovan, Wezîrê karê derve yê Swêdê, tevayên grubên partiyên Ewropî di EU de, partiyên sereke li Ewropayê, zêdeyî 800 dezgeh û şexsên ku bi xebatên mafê mirovan dadikevin” xwest ku, li hemberî vê pirsê bê deng nemînin.
Ji Unicefa Kanadayê, Sosyal Demokratên Swêd, Partiya Çep ya Swêd, Diakona (yekîtiya kilîse), Sida (dezgeha herî mezin ku projeyên însanî li derveyî welêt bi cî tîne), Insiyatifa Feministan li Swêd, Dezgeha HUMANISTERNA ku şaxên xwe li tevayê cîhanê belav bûne, bersiv hat. Wan helwêsta xwe eşkere nîşan daye. Beşek ji bersivên wan di malpera me de hatiye bicîhkirin...
Em hewil didin ku pirs bibe cihê niqaşê. EHR, bi têkiliyên yekser û îndîrek xwe dighêjîne dezgehên navnetewî. Divê însaniyetî xwedî li peymanên xwe derkeve. Pêwîst e rêz û hurmet ji mafê zarok û jinan bê girtin.
Pir giring e ku Parlamentoya Kurdistanê û Hikumeta Herêmê vê felaketa mezin bibînin û rê li ber bigirin. Xebata me jibo vê armancê didome û îşaretên dighêjin navenda me, wê nîşan didin ku, pirs dê bibe cihê niqaşên navnetewî.”
Zarathustra News – zarathustra_news@comhem.se